LEERS GENEALOGIE

LEERS GENEALOGIE

AVENANT DU 30 DECEMBRE 1578 AU BAIL DE CENSE DU MOULIN DE WATTRELOS ENTRE LE CHAPITRE DE LA CATHEDRALE DE SAINT BAVON A GAND ET JACQUES DE JONVILLE MEUNIER.

DETAILS D'UNE PRISEE EFFECTUEE LES 23 ET 24 NOVEMBRE 1570 AU MOULIN DE WATTRELOS. 

JACQUES JONVILLE archives de belgique 0658.jpg

 

01 - A tous ceulx qui ces présentes lettres verront ou oyront Maximilian Villain Baron de Rassinghien, Izinghien, francq Seigneur de Saint Jan Steene, Conseiller du Roy nostre

 

02 - Seigneur, Gouverneur et Capitaine des villes, chasteaulx et chastellenies de Lille, Douay, Orchies et des appertenances, Salut. Scavoir faisons que pardevant Gilles VAN HULSE et Nicollas LE GRAND auditeurs commis et députez au nom

 

03 - dudict Seigneur Roy, à prendre, oye et recepvoir les contractz, conven..an, marchiez et obligations qui se font et passent soubz le seel du souverain bailliaige dudict Lille. Comparut en sa personne Jacques DE JONVILLE filz de Jehan,

 

04 - monnier, demourant en la paroisse de Watrelos, lequel comparant recongnut et déclara que le dixhuictiesme de septembre XV c(ent) soixante seize, il avoit de Cornille BREIDELE, lors secrétaire et commis de Révérend père en Dieu

 

05 - très honnoré Seigneur Messire Viglius de Zwichem, que Dieu absolve, en son vivant prévost de l’église cathéderalle de Sainct Bavon à Gand et de Maître Clément CRABEELS archidiacre et député de Messeigneurs du chappitre de ladicte Eglise prins en censse

 

06 - et louage le mollin à vent à mieuldre bled gisant audict Watrelos appertenant aususdicts prévostz, Doyen et chappitre pour le terme et espace de noeuf ans continuelz et pour s’ensuivans l’ung l’aultre qui comenchèrent dès le Saint Jehan Baptiste dernier

 

07 - passé parmy paiant et rendant chascun an si comme à la carité des povres dudict Watrelos cincquante quattre razières de bled mollu tel que l’on porte journellement audict mollin, à les livrer à ses despens, aux ministres  de ladicte carité, tous les

 

08 - quinze jours deulx razières et ainsy que l’on est accoustumé les livrer les censses passées et pardessus ce, tenu de payer chascun an cincquante quattre livres parisis aux termes de Noël et St Jehan Baptiste et à raison que dudict bail n’en avoit esté

 

09 - faict quelque escript icelluy comparant veullant icelluy bail estre effectué se seroit trouvé par devers Maître Jacques DU CHELLIER recepveur desdictz Seigneurs de Chappitre de St Bavon, Seigneurs dudict Watrelos auquel y l’auroit faict apparoir dudict accord

 

10 - de bail à raison de quoy icelluy DU CHELLIER pour ce présent et aussy comparant en ladicte quallité de Recepveur auroit baillé et accordé audict premier comparant audict tiltre de censse, ledict mollin de Watrelos pour le terme de neuf ans aux

 

11 - mesmes rendaiges, devises et conditions cy dessus déclarées comenchés comme dict est et aux clergés ensieuvant déclarées et à paier de trois mois en trois mois, dont les premiers trois mois escheirent dès le dernier de septembre dernier passé et ainsy

 

12 - consécutivement de trois mois en trois mois lesdictz noeufz ans durans, à la charge aussy que ledict Jacques premier comparant sera tenu d’entretenir ledict mollin à ses propres despens, sans diminution du rendaige ladicte ferme durant de tous ouvraiges

 

13 - quelconcques et le rendre en fin des susdictz noeufz ans selon la priserie quy en a esté faicte la censse passée dont la déclaration est touchié cy après. Bien entendu sy les huisines et officines dudict mollin contenues en ladicte priserie sont trouvez

 

14 - de milleurs valeurs, l’admendement appertiendra au louager et sy elles estoient trouvées en moindre valleur sera tenu les amender saulf que sy durant ladicte ferme il connetroit avoir aucuns meubles de mollin, arbre, estacque, croisures et lo..e.s

 

15 - d’icelles que l’on appelle le chandeler dudict mollin seront par mesdicts Seigneurs livrées audict prendeur pour par luy estre mis en euvre à ses despens, en aiant par lesdictz Seigneurs ou leurs commis à leur prouffict les gros meubles vieulx telz que

 

16 - dessus qui seront ostez dudict mollin et les aultres vieulx meubles qui seront renouvelez aux despens dudict prendeur demoureront au prouffict d’icelluy prendeur de laquelle priserie la teneur s’ensieult, des quattre des flacques et ablocqz dessus.

 

17 - Lesdictz dez soixante livres huict solz, les deux croisures, huict loyens, les flacques par-dessus quatre vingtz dix huict livres douze solz, lestacque, le sommier et le chaire, cent huict livres les deux trattes, le couillart et les deux soubstrattes quarante

 

18 - quattre livres dix solz, la queue estacques, espée montée gis..t, poupées, appuyelles, postelletz et tout ce qu’il serd à ladicte montée, trente et une livre(s) quatorze solz, le paroi du fram, listeaulx, posteaulx, loyens, roilles, assellin, clauture redoublée

 

19 -  dasselin, dobeau entre deux loyens, soixante dix huict livres huict solz, le paroit des sacqz, listeaulx, posteaulx, loyens, roilles, aisselin, clauture redoublée daisselin dobeau entre deux loyens, soixante quinze livres dix solz, le paroit des ventz,

 

20 -  asscavoir les deux posteaulx cormer, entretoyse, loyens, roy..es, la grue laisselin eschattes et tout y comprins quattre vingtz quatorze livres quattre solz, le paroit de devant deux posteaulx cormers, entretoyse, posteaulx de ch..ys loyens roilles,

 

21 - le tanpenne capiteau du winders, lasselin et redoublaige asselin dobeau soixante douze livres dix huict solz, le premier plancquier dembas gistes et asselin dessus quinze livres quatorze solz, le plancquier dessoubz les meubles neuf livres douze solz,

 

22 - le plancquier dessoubz le mect gistes aisselin, encaveture ( ou encaneture) et ung posteau qui porte le plancquier, sept livres quattre solz, la petite montée du mollin, soixante dix solz. Le pont, le fléau bracon, tout utensille servant audict pont, soixante solz.

 

23 - Le mect a…ce, quarante solz. L’enquenestures des meulles et ablocqz pardessoubz et ung petit planquier tenant cincq livres. Larcure couverture « tremme » tremmion et le bacquet, quattre livres. Le frain, le cancque et le tirant du frain cincq …..

 

24 - Le baul collier et bancq thesie et baul pallier quinze livres douze solz. Le baul annie, le demy crepon estoffe de posteaulx loyen pennelle et la cloisture daisselin à heulle et à cousteau, dix sept livres douze solz. La prison du petit ……..

 

25 - La cappe, le faurin, le comble arrestie aisselin es………   ….t le demy crepon, eschamme, soixante quinze livres seize solz. L’arbre du mollin, quarante quattre livres. Le rouet, les bras, les manteaulx, courbes, chenilles, lanterne, platte……,

 

26 - soixante quattre livres, les deux volans de dehors ent…. deux poinctes hazin, cottreaulx et caulattes, vingt trois livres dix solz. Les deux vollans dedens, entrebus, deux poinctes hazin, cottreaulx et caulattes, trente et une livres. Le grand ……

 

27 -  cincquante solz. Deux marbreaux, trente six solz. Le quiente co..gnet et orgneil, icy mémoire. La cappe dudict mollin arrestié festisures du plomb et nocquiérette dessus la fenestre de l’arbre, icy pour mémoire. La meule gisante contenant

 

28 -  XVIII paulmes de large, de XV pauch d’espez, cent quattre vingtz quattre livres. La meulle courante contenant XVIII paulmes et unze pauch et ung tierch de pauch d’espez, cent trente huict livres. La corde des meules, quattre livres cincq solz.

 

29 - Deux claux dapas, deux pottences à la montée, deux aux pouppées et les pentures de la montée, cincq livres cincq solz. L’estat de la queue, une cheville à clef et à flotte, la cheville des pouppées, deux chevilles à la joincture de la queue, les mousses et crespon,

 

30 - cincq livres dix solz. Quattre chevilles aux trattes et quattreaux soubz strattes à clef et à flotte, six livres. Huict chevilles à « bendes », claux et cranpons y servantz, six livres. Le querquant an hault de le stacque et deux croissantz au « sommer », dix livres X solz.

 

31 - Les pentures de la mectz, la verge du pont, trente six solz. Quattre chevilles à bendes sus les listeaulx et deux sur l’entretoyse de derrière et deux sur l’entretoyse de devant, cincq livres douze solz. Deux chevilles à clef et à flotte en la prison, quarante quattre solz.

 

32 - Deux estriés au ba…..ames, cincquante solz. Quattre chevilles au sommier et posteau sommier, quatre livres dix solz. Deux estriés au baulch thésie, trente deux solz. Deux chevilles à bende à l’entretoyse de derrière en hault, trente deux solz. Huict fourguettes

 

33 - au windas, douze solz. L’estrié du frain et deux chevilles de quiente, dix huict solz. Quattre bende à le tourte, huict aggrapes, deux chevilles à clef et à flottes, deux pentures et ung crampon au baulch pallié, quatre livres dix solz. Au ronet, douze chevilles à

 

34 - clef et flottes, cincq livres quatre solz. Les couteau du gros et petit hatreau de l’arbre, cincq bendes de l’esta.. du marbreau, vingt deux livres dix solz. Douze chevilles des vollantz à clef et à flottes, six livres. Sur les festisures de plomb y a cincq

 

35 - chevalletz de fer, icy pour mémoire. Une flotte de métal sur l’estacque mémorial le levier escopre de meulle et le maillet mémoire les pentures serrures et verreaulx de ch…ys dudict mollin, quarante huict solz. Le grand fer lache fusée boite

 

36 - et pachon de présent nouveau rencauchie,quarante huict llivres. Laquelle priserie portant à la somme de quatorze cens soixante six livres trois solz parisis a esté faicte par Anthoine FASCON, Jacques BACQUEVILLE demonrans à Lille

 

37 -  et Pierre DE CARNE demonrant à Sailly, carpentiers et maistres ouvriers de mollins et Hughes DE LESCLUSE taillandier demonrant à Lille les XXIIIème et XXIIIIème jours de novembre XV c(ens) soixante dix, après leurs serments sollempnellement faict es mains

 

38 - de Anthoine BATAILLE, Lieutenant de Watrelos et ont apprechié ledict mollin en tous ses « membres » groz et menus saulf les parties et piéches réservées et prinses hors du viel mollin // et remi s…par les ouvriers audict nouveau molin, selon icelle appréciation et estimation ledict mollin estre

 

39 - rel…e par ledict Jacques DE JONVILLE fermier d’icelluy en fin de sa ferme et sy faict a noter que lesditz priseurs ont trouvé que ledict monnier auroit bon l’amélioration des parties icy après déclarées qui n’ont poinct esté particulièrement

 

40 - spéciffiés et appréciées en la prisée du XXIVème de juing XV c(ens) soixante. Le pont du mollin a esté trouvé méliore de vingt quattre solz, le frain trente six solz, le rouet, la lanterne chenille et fuseau, vingt six livres. Ung entrebu cincq livres dix solz.

 

41 -  Deux poinctes, cincq livres. Item pour la mélioration trouvée oultre la priserie précédente des grandz fers, douze livres. Lesquelles susdictes parties ledict monnier aura bon en fin de sa cense ou à la relivranche dudict mollin portans lesdictes parties

 

42 - à la somme de cincquante et une livre dix solz parisis pour tous lesquelz rendaiges, cherges, devises, conditions et relivranche de priserie que dessus, ledict Jehan DE JONVILLE père dudict Jacques pour ce présent et aussy comparant

 

43 - s’est constitué pleige et caution dudict Jacques son filz et ont promis et chacun pour le tout sans division ny discution paier furme, accomplir lesditz rendaiges, cherges et conditions que dessus, soubz l’obligation de leurs biens, meubles

 

44 - et immeubles et ceulx de leurs hoirs présens et futurs vers tous Seigneurs et Justices accordans par lesdicts du surnom de JONVILLE pour sceureté de tout ce que dessus main assize et  mise de faict estre faicte sur tous leursdicts  biens et heu…

 

45 - de laquelle obligation et pleigerie faicte par ledict Jehan DE JONVILLE, ledict Jacques son filz la a promis acquicter soubz pareille obligation que dessus, renverchans à toutes choses contraires ad ces présentes. En tesmoing de ce, nous a

 

46 - la rellation desdicts auditeurs par leurs saingz manuelz mis à ce susdictes présentes, avons icelles faict seeller du seel audict souverain bailliaige saulf le droict dudict Seigneur Roy et « laultruy » en tout, ce fut faict et passé le pénultiesme jour

 

47 - de décembre XV c(ens) soixante dix huict.  // Approbo huict motz cy dessus en sus lignez « asscavoir » et remises par les ouvriers audict nouveau mollin, tesmoings.   

 

Nicolas LE GRAND, 1578.                                                                                            Gilles VAN HULSE, 1579.

 

 

GLOSSAIRE :

 

Aisselin : Madrier, planche pour charpente et plancher.

Chapiteau : Toiture, auvent.

Estacque = estache : Poteau qui soutient.

Huisine = Usine : Atelier, instrument, ustensile.

Tanpenne = tampane : Pan, pignon.

 

 

 



27/11/2018
0 Poster un commentaire

Inscrivez-vous au blog

Soyez prévenu par email des prochaines mises à jour

Rejoignez les 12 autres membres